S'omine: animale interpretante.

Thathari, battordighi de Santu Gaine, duamizas e undighi.


Sos sinnos in pitziannìa.

Cando unu est minoreddu abbiadat a su mundu cun ispantu. Totu est nou, maravizosu, luminosu comente su chelu matessi de sa pitzinnìa. Totu paret bellu, e bonu e maravizosu. Dogni cosa de su mundu attirat s'attenzione de su pitzinnu. Dogni cosa est unu sinnu.

Nois abitaimis affacca a s'istradone ca babbu fut contoneri e sas manghinas de s'istradone fin prenas de medres betzos chi sa zente ch'ettaiat passende in vettura.
M'ammento chi totu cusso oggettos fini pro a mie mutivu de grande curiosidade ca proite dognunu de issos mi faeddaiat de su mundu.
M'ammento sas iscatulas de lomminos - Lubiam - nde faghio sa regolta, los collìo coment'e tesoros; sos tubettos de dentifriciu de allominiu, bicculos de giornales, ferros betzos, totu cussa cosas fun sinnos de su mundu, unu mundu attesu, chi los produiat, chi los bendiat, chi nde los battiat fina igue.
Deo cussu mundu no mi lu podia mancu imazinare ma ischio chi in calchi parte cussu mundu bio fit, e fit divessu dae cussu inue fio deo. A mie mi pariat tando de viver in d'unu chizoneddu de su mundu.

Sa notte cando in lontananzia, poi de sos montes bidio lughes de biddas lontanas, cumprendìo chi bi fit ateru mundu pur incue. E poi barigadas sas montagnas, cales ateros mundos?

I s'sitradine passaiat una macchina marrone e b'aiat iscrittu "POLIZIA SCIENTIFICA" a litteras mannas, cussu puru fit unu sinnu. I' sa corriera chi passaiat donzi die b'aiat iscrittu "SCIA" e cussu puru fit un ateru sinnu. Sos militares chi benian a fagher sos campos militares benian in sa "camionetta" ei cussa fit piena de interrutores e de ispias luminosas, sinnos.

In su campu militare calicunu soldadu giughiat una iscatula birde cun d'unu cordone nieddu ammorotuladu, fit su radiotelefono, podian faeddare cun ateros militares attesu.

Addaisegus de sa contonera b'aiat una grande pala de acciaiua chi battiat s'elettricidade a sa contenera ei su notte fagiat unu rumore manu cando andaiat su entu "ffru-ffru-ffru-ffru" fit "s'elica de sa lughe", fit unu sinnu de un mundu.

Sos elicotteros de sos carabineris benian in trumas, tres, chimbe, ses, finzas deghe pro sas esercitasssiones militares, e fini sinnos potentes.

Poi in su chelu calchi olta passaian puru sos "caccias" apparecchios velozes chi faghian unu bottu mannu bolende.

Sinnos de su mundu, de unu mundu grande, potente, portentosu.