Mi so abizende a manu a manu chi iscrio custu blog chi meda de sos lettores chi intrana no ch' ana a torrare prus, ca puru si sun sardos su sardu no lu faeddan, no lu cumprenden, no l'ischini mancu leggere.
E tando tiad esser ora de faeddare de sas responsabilidades de custa catastrofe antropologica e limbistica (comente naraiat Pier Paolo Pasolini).
Bidimus sas resposanbilidades
de sa pulitica
de sos intellettuales
de sos giornalistas/media
de su populu
Deo bos fato s'esempiu meu, ma est s'esempiu e totu.
Su sardu no mi lat insinzadu niune, si no deo matessi. In s'iscola su sardu est bistadu pribidu, sempre. S'iscola italiana est bistada nemiga de sa limba sarda, no sempre, ma dae su fascismu in poi.
Sos sardos chi faeddan, iscrien e leggen in sardu sun totu auto-didattas.
Sas responsabilidades de sa classe pulitica sun mannas che muntagnas, su ritardu de sa cuscenzia pulitica in materia de limba no si podet medire.
Poi bi sun sas rtesponsabilidades de sos famados intellettuales: accademicos, professores, giornalistas, iscrittores. Sos intellettuales sardos sun divisas no in duas ma in paritzas categorias:
1 cussos chi creen in sa nezessidade de tutelare sa limba e lu naran - sos credentes
2 cussos chi cheren sa tutela e sa limba in iscola - su populu
3 cussos chi creen chi imparare su sardu cheret narrer a no imparare s'inglesu e timen un'arretramento culturale pro more de sa limba sarda ( limba comente strumento di riscatto sociale, custu sun sos intellettuales de sa carestia )
4 cussos chi sun pro sa cultura locale ma no connoschen sa limba - agnosticos
5 cussos chi ana responsabilidade ma no ana mai istudiadu sos problemas de sa limba - ignorantes
6 cussos chi sunu bene ammanitzados cun sa politica e mandigan a battor barras. - matzones
7 cussos - giornalistas, istoricos, accademicos, su pius - chi no biden s'ora de faeddare contra a sa limba, de fagher distinguo, de ponner paracarros, deo los giamo sos bastian cuntrari de sa limba sarda. Pro custos no b'at remediu. Iscrien male e biven peus.
8 cussos, pro finis, chi naran chi sa limba sarda est morta cun sa fine de sa Sardigna rustica (1950-1960) e duncas s'operazione diat essere una operazione de anatomia patologica, o mezus ancora una ispessie de autopsia. Custos sun sos unturzos.
9 Sos amateurs: bi nd'at pro totu sos gustos; custos ana leggidu pagu e faeddadu meda, iscrien puru liberos russos, pienos de immaginazione e de paga iscienzia: custos deo los giamo sos dilettantes allo sbaraglio, sa Sardigna nd'est piena, in pulitica, editoria e accademias puru.
 |
| Rembrandt: Lezione de notomìa. |
S'elencu diat poder continuare, ma pro oe mi paret bastante, in su post chi enidi amus a faeddare de sas responsabilidades puliticas.
No est pro fagher polemica, ma pro no tenner indignados unu pagu, bidu chi innoghe drommini totu e no s'indignat nisciune.
INDIGNADEBOS (a su nessi una orta onzi tantu!)
Nessun commento:
Posta un commento