TISSI: Sa surpresa de Nino Navarru.

Thathari, su doighi de Sant'Anadrìa, duamizas e undighi

Una surpresa a sa presentada de sa Cantone de Flora, in Tissi, a su Exma.


guasi unu coup de thèatre, dignu de sas mezus tradissiones.


Surpresa manna deris in Tissi, in su Exma (Ex mattatoiu comunale)  a sa presentada de su liberu de sas editziones Angelica. a conclusione de s'abboju b'est bistadu un interventu inaisettadu de su nepode de Bertulu e' Serra su Prof. Nino   Navarru, chi tenet 92 annos ma est arzillu meda.
Su Prof. Navarru at nadu chi in vida sua at pubblicadu vintiduos liberos e como est amanizande sa autobiografia sua. E at puru annunziadu in mesu a sa incredulidade generale chi in domo sua b'at poesias de Bertulu 'e Serra galu ineditas.

Su misteru est legittimu: e proite at isettadu totu custu tempus a fagher cust'annunziu? Misteriu chi deris no b'at apidu tempus de apprufundire.

Su sindigu at faeddadu pro primu nende chi sa povera Flora no at apidu mai sa paraula pro si difeneder dae sa accusas de s'omine-poeta Bertulu e Serra ca fit femina e fin sos omines - comente solitu chi cumandaian - sas feminas no aian boghe.
S'studiosu Stefano Flore - chi at feddadu in sardu - at ammentadu comente in sa introdussione a su liberu faedat propriu de custa femina chi no at apidu mai sa paraula pro si difendere dae sas accusas de su poeta -amante de essere una cucuri-lebia.
Su poeta Giovanni Fiori de Ittiri , omine impignadu socialemente e puliticamente (at militadu a tempus sou in su Partidu Comunista de Berlinguer) s'autore de una silloge famosa de poesias in limba sarda "Camineras" at faeddadu de sa cantone de Flora nende de sa relassione chi bit in sa soziedade rustica tra omine e femina, chi fit una soziedade "machista" inue su masciu teniat sempre rejone (assumancu in pubricu, in privadu forsis sas cosas fin diversas meda...). E duncas mentres su poete-omine  Bertulu 'e Serra aiat potidu iscriere una cantone contr'a sa femina chi l'aiat refudadu, sa femina, Flora, chi fit cunnota in Tissi cun su nomene sou reale, no s'est mai potida difendere. E tando est giustu poi de tantos annos torare giustiscia ai custa femina.
su Prof. Nicola Tanda at faeddadu de s'importanzia de sa poesia pro s'omine modernu addainantis a sos limites de su razionalismu illuminista chi nos aat battidu in s'oru de s'irrocamentu colletivu.

Amus a trattare s'interventu de Prof. Nicola Tanda in d'unu post a parte ca su interventu sou est a bisu nostru importante meda. No solu pro sa poesia. E no solu pro sa poesia sarda. Interventu de grande levatura merìtat de esser presentadu cun calma.

Cun uras de unu bonu fine-e-chida.

UNU DICIU PRO MELEDARE: "In mesu a s'alligra b'at sempre una digrascia ammanizada" (Est de Bertulu 'e Serra, ma no ischimus si custu diciu fit populare finas apprimu.