Bonas Pascas

Thathari, su Vintises de Nadale Duamizas e undighi,

Bonas Pascas, 


Bona Pasca 'e Nadale, e  Bonos incuminzos e mezus fines.

aggiummai m'ismentigaia de dare sas Bonas Pascas a sos battor amantiosos e pascensciles lettores.

Bonas Pascas a tottu,cun  Milli Uras de una mezus vida pro totu.

Totu ischides chi su Nadale Cristianu est sa prosecuzione de su Nadale de Mitra - naschidu in 'd'una grutta su 25 de su mese de Nadale - e de tantos ateros mitos de salvamentu.

In su solstizio de jerru puru sos romanos affestaian sa festa de su Sol Invictus, est a narrer sa vittoria de sa lughe subra sas tenebras de su mundu 'e sutta, de sa notte, de s'ateru mundu.

Fit sa festa pius manna e s'annu ca cheriat narrer su prinzipiu torra de sa vida ca su sole agabbaiat de miminare e torraiat a creschere, finas si custu cheriat narrer su prinzipiu de s'jerru.

Sos mitos, sos simbulos e sos archetipos sun importantes meda pro s'omine e pro sa salude de sa mente, comente nos ammentan Carl Gustav Jung, Elemire Zolla, Freud e ateros filosofos e pessadores, e pro cuss'est chi no devimus fagher sos presumidos e trattare simbulos e mitos comente cosas de ignoranzia e superstiziones innutiles.

A su contrariu, nos devimus preguntare subra su sinnificu profundu de custos mitos pro sos omines de onzi tempus.

Su Nadale est su mitu de salvazione pro eccellenzia, cheret narrer chi s'isperanzia de cambiare, de si rinnovare, de creschere (comente su sole) e de torrare a bida noa no devet essere mai perdida ca si nono s'omine s'abbandonat a su disisperu e si lassat andare comente unu navìu chena guvvernu.

A bois totu sas uras de poder rinnovare sempre s'isperanzia de unu mundu pius zustu e pius eticu, chi cuminzat, balet sa pena de si l'ammentare, dae s'ispiju inue nos abbaidamus dogni die, dae nois e tottu. Si cherimus cambiare unu pagu su mundu devimus cambiare a nois matessi;  custa est sa grande lotta de sa vida e nudd'atera. Si amus a resessire a cambiare a nois matessi in mezus tando su mundu, aberu, at a essere unu logu mezore de cussu chi amus agatadu.

No devimus aisettare chi cambien sos atteros, devimus mezorare nois matessi, sa nostra cuscenscia, sa nostra connoschenzia de cussu chi semus e de cussu chi cherimus essere.

A ruere amus a ruere donzi die, ma cussu chi contat est a si nde pesare e cuminzare torra a caminare.

Sos arabos - forsis su Coranu -  naran chi sa grande Jihad no est sa gherra contra e sos infideles, ma sa gherra contra a nois matessi. Custa est sa Grande Jihad, sa gherra contra e sos infideles est una Jihad minore, no sa pius importante.

Bonos incuminzos e mezus fines