Su Presidente de Sa Repubblica in Thathari.

Thathari, su vintinunu de Frearzu Duamizas e doighi.
MARTIS DE CARRASEGARE-CARRASCIALE

Cronaca de una die ispeziale?

Una die ispeziale pro Thathari e sa Sardigna?

Su Presidente de sa Repubblica Giorgio Napolitano est bennidu in visita a Thathari e at abbojadu sa zittadinanzia, sos istudentes ei sas autoridades pro s'inaugurazione de su Auditorium affacca a sa Cheja de Cappuccini e de su Cunservatoriu de Musica.

Deo so essidu dae domo a tardu, ca oe est vacanzia iscolastica sende chi est Martis de Carrasciale/Carrasegare e fio pensende de andare a sa biblioteca comunale pro chircare unu liberu "il Mulino di Amleto" de Giorgio de Santillana e Hertha von Dechend, unu liberu curiosu meda chi faeddat de sos mitos subra su tempus, su chelu e sas costellaziones.

Poi, passende in Viale Trieste apo idu sas bias bloccadas e unu muntone de carabineris, polizia e finanzieris e paga zentoria. Ischio già chi bi fit Napolitano i' s' Auditorium e tando leadu dae sa curiosidade mi so acculziadu.

Fizu meu est andadu a bidere Napolitanu cun s'iscola e duncas  fit in s'Auditorium.

Foras de s'Auditorium, bi fin sos pastores ei sas muzeres ei sos fizos cun sos mucaloros blu e giallos (mi so dimandadu: ma custos pastores ite ana votadu in custos annos? Berluscone o Murtadella? bae e chirca, no apo mai cumpresu, ma pro a mie si su mundu no si est fattu in regottu, sos pastores si sun poveros dian esser de sinistra - de manca, si sun imprenditores dian esser de destra - per antonomasia). Mah, bae e chirca. Est capatzu chi bi nd'epat de manca e de destra. Siat comente si siat, sa pius parte faeddaian in nugoresu e barbaricinu e fin isettende a bessire Napolitano pro fagher cuntestazione. Sa polizia los teniat a bada - comente si narat. Una giovana de su gruppu s'ets fatta groga e s'est dimajada in mesu a sa zente. Bi fin sas ambulanzias e che l'ana jutta a s'sipidale. Paga zente addaisegus de sas transennas, omines, feminas, curiosos, faccias nodidas e pagu nodidas, pitzinnos, istudentes, zente cun d'unu papiru in manu pro ammentare sa femina sarda Orrù, presonera de sos gherriglieros.

Sos pastores nachi su Presidente abbojat potentes e bidet teatros e museos ma sa zente sighit a suffrire e no la faeddat nemmancu. 

Vicinu a s'Auditorium una giovana in iscarpittas leopardas, bolero leopardadu e minigonna 'addighinosa faghiat abberelare mannos e minores. Nachi fit una istarlette locale in chirca de nodidade. 

A mesudie e mesa Napolitanu est bessidu dae s'Auditorium e s'est avvicinadu a sa macchina chi lu fit aisettende in Piazza Cappuccini. Sa televisione s'est avvicinada pro una intervista lestra e poi est setzidu in macchina poi de aer saludadu sa zente cun sa manu. Tai-tais, fruscios, saludos, sas protestas de sos pastores, sas macchinas de sa polizia chi si allontanan lestras in direzione de Viale Trieste e poi sa zente cuminzat a bessire dae s'Auditorium. Appompio su preside dae tesu ma no apo gana de mi fagher a bidere.

Poi in su TG3 regionale apo idu s'intervista ei su Presidente chi si naraiat meda "colpito" dae sa situazione economica de sa Sardigna chi at definidu "grave meda, sa peus crisi de s'Italia intrea" e at promittidu de impignare su guvernu in calchi azione de riguardu a sa Sardigna. 

Amus a bidere, sa Sardigna, totu l'ischimus est s'ultima roda de su carru ei sa pius debile ca amus puliticos pius romanistas  de sos romanos.

Sos pastores si sun incaminados cuna sas metrakulas, sos fischiettos ei sos cambales a parte de su Centro storico, unu giovanu si fit buffende unu bitter ruju, caminu fattende, e un'ateru faghet "A inube semus annanne?" "Boh, ai cust'ala". 

Bonas uras, apo pensadu ghirande pro andare a Piazza Tola, già nd'azis bisonzu ois puru.

PS Zertu chi...una malignidade, ma propriu sa die de Carrasegare deviat benner a Thathari? No ad a esser tota una buglia?

UNU DICIU PRO MELEDARE: chie isettat piattu anzenu frittu lu mandigat.