Diad essere unu bloggista autorizzadu a s'istraccare?
Mi rendo contu chi cando s'incuminzat un'impresa comente unu blog toccat de li dare a mandigare dogni die, comente a unu TAMAGOCHI, si no sos battor lettores s'isfadan, s'iscoccian e si che allargan chena mancu una paraula.
 |
| Roma, Museos Capitolinos: Galata morzende. |
Già mi la ido sa risposta: no t'esseres fattu bloggista!
Fazile a lu narrer, est comente a narrer: as cherfidu sa bricichetta? pedala como!
Rejone tenides, est chi, donzi tantu, puru unu bloggista at bisonzu de isfogu.
Sa solitudine de su bloggista est unu pagu (anzenante) alienante.
Inoghe m'intendo calchi olta comente Jona in sa entre de sa balena. A bortas mi paret chi in custu logu no ch'at niune. Niune chi t'iscriet, niune chi dimandat, niune chi criticat, niune chi t'iscriet unu cantu e messaggeddu de duas rigas, mancu unu twit!
Ite cherides chi bos nerza? Istraccu so istraccu ma mi dispiaghet si s'accerat zente a sa janna e domo in chirca e calchi cosa e mastigare e si ch'andat chena nudda...Mi dispiaghet troppu...
E tando mi paret chi bos assento una banca cun d'una cadreeddda e una tazza e inu e bos leggio una poesia, anzi bo' la posto, in su post chi 'enidi, e bo la leggides cun calma, in domo 'ostra.
Saludos, tenidebos contu,
azis a iscujare s'isfogu, ma inoghe no s'idet mai nisciunu...
UNU DICIU PRO MELEDARE: Totu est pro sa 'entre e a s'anima niente.
Dadu chi mi das calchi cosa de mastigare, deo puru contribuo a s'opera chi faghes pò, o pro, sa poesia e nde imbio una chi mi piaghet meda, e creo tue , iscusa pò su tue ma tra Sardos.... e poi semus guasi fedales, connoscas già e chi a sos dischentes tuos creo chi at selvire meda in sa vida cà a boltas semus troppu "supponentes" supra su giudigare, chi poi est esprimer unu giudisciu tou supra una pessone non dare una cundanna mancari a boltas siat propriu gai, sos atteros pensende de connoscher su chi sunu e chi si bi pensamos bene, atteros, semus puru nois pò atteros. Su poete fit, ed est mancari siat mortu, de sos mannos de Sardigna secundu me, in ispecie in cussa improvisada, tiu Remundu Piras de Biddanoa Monteleone:
RispondiEliminaMisteriu
Cand'a mie matessi eo domando
paret chi solu a musca tzega joghe,
paret ch'intenda néndemi una oghe:
"Deo ti nd'apo atìdu e ti che mando".
Li naro: "Si ses tue, prite tando
no ti presentas, po chi t'interroghe?
Ischire dia cherrer a inoghe
da inue so énnidu e ue ando".
Si finas s'esser meu m'est ignotu
po chi deo cun megus note e die
cunviva, si mi nán: "Tue ses chie?",
poto risponder: "No mi so connotu".
Naran chi tzeltos connoschen a totu
e deo no connosco mancu a mie.
---------------------------------------------------
Saludos dae Franziscu Ispanu.