SA LIMBA ANDAT A SU LICEO.

Thathari, su vintisette de Santu Gaine, duamizas e undighi.

Gioja.

CURSU DE LIMBA SARDA IN SU LICEO “AZUNI” DE THATHARI.

In su liceo Azuni

Sa cundivisione de su caminu de faghere.

Est cuminzadu oe su cursu de limba e cultura sarda KISURAS 2

Su cursu est intituladu : multilinguismo lingua e cultura locale e e at comente obiettivu unu de contivizare su imparu de una superlingua, s’inglesu, sa limba nazionale e sa limba minoritaria o locale.

Oe a sas tres poi mesudie est cuminzadu su cursu ‘e duos de limba e cultura sarda pro sos pitzinnos de su Liceo Azuni.

B’at galu logu si calicunu si cheret iscrier.

Coment’e su solitu sos pitzinnos su meda pius addainanti e pius luzzigos de sos mannos chi creen de aer sa veridade in busciaca, pret-a-porter.

Difattis aimis imazinadu unu cursu subra sos grandes iscrittores sardos de su noighentos e aimus imazinadu de iscrier una recensione de calicunos liberos importantes issoro e sa issoro biografia.

Però no fimis meda siguros chi custu le’sseret agradessidu meda e chi forsis sos bisonzos issoro fin differentes dae sas fantasias de unu professore unu pagu ruinzadu e addainanti in sos annos si no betzu e arteriosclerotico.

BRAINSTORMING session (TEMPORALE DE CARVEDDOS)

Su resultadu de sa discussione.

[su temporale de carveddos est su chi faghen totu sas grandes aziendas de su mundu cando cheren ponner umpare sas mezus bideas pro andare addainanti e mezorare, cussu insomma chi sa pulitica italiana, o regionale, at fattu pagas bortas in sos ultimos vinti annos]

E gai daboi de una introdussione multimediale in aula computer –power point + blog – subra sa relazione ECONOMICA, LIMBISTICA E CULTURALE intr’e locale e globale e una panoramica subra su funzionamentu de unu blog., SEMUS ANDADOS IN D’UNA ATERA CLASSE lis apo dimandadu:

Ø ite bos ispettades dae custu cursu?

Ø Proite sezis bennidos?

Ø E ite bos dia piagher a fagher ?

Ø It’est chi cherides fagher e ischire subra sa limba e sa cultura ?

Ø E cale prodotto fianale cherimus faghere umpare?

Devides esser sinzeros lis apo nadu e mi devides narrer abberu su chi pensades e bos isettades.

Sas ripostas issoro no sun tardadas a benner.

Custa arrejonamentu s’est tentu in limba italiana pro chi totu potere ispressare chena inciampos sas bideas issoro. B’at a esser su tempus e sa manera de impreare inglesu e sardu. Deo lu so ‘ortende in sardu.

Francesco 1.

Mi diat piagher a ischire in d’ite cunsideru sos zovanos tenen sa limba sarda, si lis piaghet o nono., si l’impreana, cando...insomma ite percezione nd’ana, custu mi diat piaghere...

Chiara.

Emmo, su professò, no pensat chi diat esser bene a bider sas rejones proite sos zovanos refudan sa limba sarda? E proite sa majoria de sos zovanos naran chi sa limba sarda est grezza, rustica, roba de zentaredda ignorante? Proite sos zovanos no nde cheren s’intesa? No tiad esser bellu a cumprendere su pruite de custa situazione?

Francesca.

Emmo, emmo, diat esser bellu a ischire proite sos continentales benin a innoghe e faeddan male de a nois e naran chi semus terrones, arretrados e si ponene a rier cando nos intenden faeddare. Proite lu faghen? Proite pensan custas cosas de a nois ?

Federico.

A mie mi diat piagher a bider calchi film chi faeddat de sa cultura sarda o de sos problemas de sas differenzias culturale comente su film V come vendetta.

Francesco 2

Proite sos sardos su trattados comente diversos, comente sos ebreos de una ‘orta?

Raimondo

Ello? Proite custu pregiudiziu de sos continentales contr’e sos sardos?

Melissa

Est interessante a bidere proite sos zovanos no cheren sa limba sarda o l’imprean solu pro sas parolaccias. Si diat poder abaidare unu film in limba sarda.

Francesco 3

Mi diat piaghere a bidere sa relassione tra musica e limba e poi mi diat piaghere a bidere si in sos films de s’istituto Luce chi bi sunu puru in s’internet b’at calchi pregiudiziu contr’e sos sardos.

Chiara.

Però si no faghimus unu pagu de limba, assumancu sos rudimentos de base, no la connsochimus e no ischimus mancu leggere nudda in sardu, duncas unu pagu de limba sarda la devimus faghere.

Totu

– Emmo, emmo, devimus ischire a su nessi cumprendere ite b’at iscrittu in d’unu testo, a lu cumprendere, pro cuminzare.

In s’impertantu su professore at leadu apuntos in sa lavagna e sos istudiantes si los an copiados: in finis est resultada custa mappa mentale de su caminu chi devimus fagher umpare:

SA MAPPA DE SU CAMINU DISSINNADU UMPARE.