Sende andende in Catalunya.

Thathari, su 23 de Abrile, duamizas e doighi.

BIAZARE EST CONNOSCHERE: SENDE ANDENDE IN CATALUNYA.


Abberu dogni biazu t'irrichit ca imparas pius de fagher cale si siat atera cosa. Sende andende in Barcellona apo connottu unu professore Catalanu de s'Universidade de Architettura de s'Alighera.
Un'omine zentile meda e de cultura. Ischende chi fimis andende a Barcellona cun sos istudentes de su Liceo pro unu biazu de istruzione m'at nadu ite aliat sa pena de visitare e ite devimis lassare a perdere.
E gai m'at faeddadu de Gaudì, de sa Pedrera, de sa Sagrada Familia, e subra e tottu de su centro istoricu, de su Barriu Goticu e de sa Cattedrale del Mar. Sende unu professore de Urbanistica ischiat su chi mi fit nende. M'at iscunsizzadu de visitare Tibi dabo e de visitare sos logos de s'isperimentalismu architettonico de su noighentos.

Gai amus fattu cun sos piseddos e amus bidu una zittade- metropoli, bella, hermosa, europea, simizante a Parigi, allegra pius de Londra, zeppa de monumentos, de architteturas, de cultura, de istoria, de memoria e de modernidade. Un'esempiu de immaginazione, creadividade, bellesa e memoria istorica pro s'Italia e pro sa Sardinia.

Pro milli motivos chi no bos isto a descriere no aio mai visitadu Barcellona in bida mia. Ma si no l'azis fattu, azis a esser paghizeddos sos chi no l'an fattu, faghidelu, e no bo' nd'azis a penetire.

B'at logos,comente sa Sagrada Familia chi sun cummoventes pro sa bellesa, s'ispiridualidade  ei s'immaginazione chi ammustran. Chi unu siet o no siet cristianu b'at de ammirare s'ingegnu creativu de sos artistas - Gaudì in primis, ma no solu, chi b'an tribagliadu e chi sighin a bi tribagliare ca sa cheja no est finida e no s'ischit cando ad a esser finida. S'opera est andende addainanti dae su 1866, cando est bistada cuncepida pro sa prima 'orta.

Ma bos fio nende deu su professore de Urbanistica. Intr'e sas ateras cosas m'at nadu chi LUNIS 23 DE APRILE , est a narrer oe, ma nois semus torrados derinotte dae Barcellona, est sa die de Sant Jordi, su patronu de sa Catalunya ei sa zente affestat cun d'una tradissione: i sas bias regalan a totu una rosa e unu liberu. E difattis sas bias de Barcellona fin pienas de istendardos catalanos e de manifestos de Sant Jordi, chi tiat essere Santu Giolzi.

E faeddende de liberos m'at cussizadu su liberu de unu iscrittore catalanu, Javier Cercas, ( si pronunziat Havier Thercas ) Soldati di Salamina, ambientadu a sa fine de sa segunda gherra mondiale e de sa gherra zivile ispagnola.

Ecco, it'est su biazare, comunicare cun zente noa, aiscultare, imparare cosas chi no pensamus mai de fagher o de connoschere. Accò, proite est bellu.

Deo bos giro s'informazione, magari bo lu cherides comporare bois puru.