Die de sa Sardigna? Ma mi faccia il piacere!

Thathari, su 28 de Abrile 2012


Sa die de sa Sardigna: una vacanscia pro istudentes.

Liberu de sas medias (annos '60)

No bos isettedas dae parte mia "celebraziones" de custa die. No b'at nudda de celebrare, si no su "disfacimento" de un'idea de identidade chi at fattu sos annos suos, de una pulitica affarista e malintragnada, de una intelletualidade distratta e sonnida. Su populu coment'e sempre suffrit e patit in selenziu ei sos mannos    , sos chi han "potere" si nd'affutin de su totu.

Pro cussu su motto nostru est "abbasso sa die de sa Sardigna" criadura chena conca e chena coro, comente sos personaggios de "Il mago di Oz".

Sa die de sa Sardigna in Sardigna est famada meda in sas iscolas sardas, ca totu sos istudentes ischin chi est die de vacanscia.
No dimandedes ai cussos istudentes matessi ite si affestat e proite: no l'ischin. E proite no l'ischin? Ca sa die de sa Sardigna isso la passan a lettu e no in iscola, ammandronados e no istudiende sa cultura de sos mannos.

Cust'idea chi si potat fagher festa solu serrende sas iscolas e lassende sos istudentes in domo imbetzes de los interessare a sas cosas de sa cultura issoro est un'idea brillante. Infattis in 'dunu colpu solu politicos e intelletuales sardos s'an bogadu dae conca s'isfadu de imbentaresi calchi cosa de intelligente de narrer a sos pitzinnos subra su passadu ei su futuru de sos sardos.

Bandelas.

Cun sa licenza generale de sa vacanscia s'impizu est bogadu e niusciune si devet leare impodda meda pro organizare riflessiones subra e s'identidade o sa diversidade (chi poi sun sas duas caras de sa matessi medaglia):

A narrer tota canta sa veridade, dae cando est bistada istituida custa festa no m'at mai appassionadu, e a cantu nd'isco no at appassionadu mai su 99 pro chentu de sos sardos.

Su pruite est fazile a lu narrer. A primu e tottu sa die affestat "la cacciata dei savoia" ma cussos chi l'an istituida si sun'ismentigados chi sos matessi sardos chi dian aer "cacciato" i Savoia, passados tres meses los accoglian torra cun totu sos onores! E tando? Ite semus festeggende? Sa coerenzia de sos sardos? S'amicizia tra sardos e continentales? Su pentimentu de sos sardos?

Pasende.

Sa veridade est chi est una die completamente isballada. De seguru si podiat lassare in pasu s'istoria Sabauda chi no est meda onorevole pro sos sardos e leare magari calchi data de sa prima gherra mundiale o calchi atera die simbolica, comente sa die de Santu Antine chi est de aberu s'unica festa chi aunit totu sos sardos!

Duncas no bos isettedas dae parte mia "celebraziones" de custa die. No b'at nudda ite festeggiare si no sa dabbenaggine de sa pulitica ei su sonniu de sos intelletuales sardos.

Lezione de Kisuras 2.

Ma pro no serrare in disisperu su motto de sos sardos nazionalistas e identitarios, progressistas e democraticos abberu (no sas barzelletta de sos partidos italianos)  devet esser su motto de sa resistenzia a sos fascismos de ogni zenìa, sien issos puliticos, intelletuales, economicos o culturales: su mottu nostru est unu: oe e sempre resistenzia. (Pro a mie totu sos sardos si dian dever assentare a s'ANPI, associazione nazionale partigiani d'Italia). Est una contraddizione? Nono, ca sos primos chi lean pro su culu sos sardos sun sardos e totu! 

Thathari, Viale Dante, Particulare in d'una fazada.

Bendidos, ma sardos. E tando?

Bona notte a totu (no est denotte como est die mannu).

UNU DICIU PRO MELEDARE: Pedra roddulana no ponet mai lana (a rolling stone gathers no moss).