Bonas Pascas cun Buddha.

Thathari, su deghe de Abrile duamizas e doighi.

BONAS PASCAS CUN BUDDHA.

AVVISU

Deo no so nisciunu pro bos faeddare de Buddha, ma una cosa apo cumpresu forsis, chi leggere su pensamentu de omines grandes comente su Buddha (s'Ischidadu, cheret narrer, s'illuminadu, cussu chi at cumpresu) faghet solu bene a su coro e a s'spiritu, ei puru a sa mente in generale.

Cun custu, sigomente est Pasca de Abrile bos chelzo fagher unu regalittu chi no mi costat nudda.

No isco propriu canto buddhistas ch'at in Sardigna.
Sigund'a mie pagos meda. Ma paga zente mezus festa, narat su diciu. A donzi modu, sien o no sien meda, chi est buddhista connoschet a memoria sas peraulas de s'ottuplice sentiero, sa bia manna pro cuminzare a pratigare sa sabidoria a primu chi siet troppu tardu.

Sigomente est Pasca e semus totu pius bonos ca s'istoria e Gesus Cristos mortu in rughe pro salvare s'umanidade nos faghet totu unu pagu pius responsabiles, bos chelzo reagalare s'ottuplice sentiero buddhista pro chi cumprendemus calicunas cosas:

su buddhismu, chi est cretidu una religione, no creet in perunu deus chi no siet su SE matessi chi abitat in dogni persone e chi est fonte de sa dignidade matessi (connosche a tie matessi naraiat Socrate), est una filosofia de vida;

sas religiones sun totu un'iscorciatoia pro intrare in cuntattu cun su SE chi dognunu no ischit abitat in su coro sou matessi

sas religiones no teven essere milciadas cun sas autoridades religiosas chi sun sa burocrazias de s'ispiritu

sos omines si sun sempre appadronados de sa divinidade a cuminzare dae sos tempos pius antigos de s'umanidade

cando una zittade mesopotamica cheriat mover gherra a un atera zittade si presentaian sutt'a sos muros e naraian:

" mì chi sa dea de sa luna, Inanna, chi abitat in chelu, est cun a nois; tando si bos suttamittides subitu no bos amus a mover gherra e pagades sas tassas chena ciunciare, si no bos movimus gherra e bos bocchimus, bos leamus isciaos e destruimus sa zittade"

cuddos unu pagu fin impressionados dae s'atza de custos bighinos pretenziosos, ma poi li rispondian: "Ehm, amus a bidere, pro cussu chi nos constat Inanna, chi tra parentis est masciu e no femina, ca l'ischin totu chi su deus de sa luna est masciu, est cun a nois, e duncas nois semus pius fortes e casu mai sezis bois chi bode devides suttamittere!"

su messaggeri forsis si l'isettaiat una risposta e su genere, e in su primu casu de gherra contadu, s'assediu de Aratta (Kramer Noah Kramer, Sas primas trentases bortas in s'istoria), si che torresit a sa zittade sua, comente si narat "con le pive nel sacco", a manos boidas. Tando su re li desit un'iscrittu in argilla, in cuneiforme, nendeli chi issos fin potentes meda, chi Inanna fin cun a issos e chi s'esseren rendidos. Cando su messaggeri arrivesit a Aratta - chi ., tra parentis fit una zittade ricca meda, dedit sa taulitta de arghidda a su re de Aratta. Custu s'arrabiesit meda ca no ischiat leggere e no ischiat ite fit s'iscrittura e che mandesit su messaggeru in malu modu nendeli: elo, ite regalu m'as battidu, una taulitta de arghidda, bae a su re tou e no che torres pius si no ti occhimus."

Sos mesopotamicos torresin cun s'esercitu e cun sas bonas e cun sas malas cumbinchesin sos de Aratta chi Inanna fit de abberu cun a issos. Comente si podet bider sa psicologia de s'omine no est cambiada meda in sos ultimos chimbemiza annos, pro brigare totu est a acciapare un'iscuja.

GOT MIT UNS, Deus est cun nois b'aiat iscrittu in sos cinturones de sos soldados nazistas.

Ma torramus a s'ottuplice sentiero, chi diat esser ora:

retta visione - cheret narrer chi devimus abbaidare sa realtade pro coment'est, chena illusiones

retto pensiero - cheret narrer pro a mie chi devimus pensare cun su coro e no cun sa "ragione", sa contabile de sos sentimentos

retta parola - cheret narrer, a parrer meu, chi devimus faeddare chena "lingua  biforcuta" nende pane al pane e vino al vino, cun sinzeridade, chena ipocrisias, sa veridade, su chi est, chena rabbia, chena timoria, chena falsidade in su coro, a cor'in manu, comente si narat.

retta intenzione - cheret narrer, sempre a parrer meu, chi cussu chi contat cando faghimus sas cosas est chi las faghimus sighende su coro, sa cuscenscia, cussu chi nos dettat s'animu

retta azione - cheret narrer chi s'azione tevet essere coerente cun su pensamentu, chi no podimus pensare , o faeddare, de una manera e fagher in d'un atera, si no ba't coerenzia,  ite semus?

retta presenza di spirito - cheret narrer chi devimus esser cuncentrados a sighire sas cosa importantes chi amus dezisu de sighire, chena ismentigare, chena brincare dae una cosa a s'atera, chena nos fagher isviare dae sas cosas de su mundu


retto modo di vivere - cheret narrer chi bi devet esser echillibriu intre e sas cosas materiales e ispirituales

retta meditazione - cheret narrer chi una vida chena riflessione ite vida est? pissighimus sas pantasimas de ogni die, de sa materia e no amus tempus de nos abizare chi su tempus est fuende die cun die, e nois cun issu.

ATTINZIONE . No so mancu siguru chi sa traduzione italiana est cudda giusta, ma pius o mancu....

Bos paret paga cosa?

Pro cuminzare, abbaidade comente sos otto cunsizos sun cunsighentes unu a s'ateru e chi dognunu sighit de nezessidade su chi narat su chi enit a primu.