TORRADU BI SES?

Thathari su 24 de Capidanni Duamizas e battoldighi.

TORRADU BI SES? 

Ad a esser ca oe sogra mia lompet 89 annos e li chelzo fagher sas bonas uras in su web, ad a esser ca aio finzamentas gana de torrare a iscriere in sardu in su blog chi est naschidu in limba sarda, siet comente si siet, accomi torra in su blog a iscriere in sardu.

E it'est an a narrer sos duos lettores e mesu chi mi sun imbarados chi m'at trattesu dae iscrier totu custu tempus barigadu?

Su fattu est6 chi custu web ti dat puru sa possibilidade de espressare bideas e sentimentos ma est unu logu frittu e solastigu inue tue t'acciapas solu cun sa tastiera e cun su calculadore. 

E duncas poi de un annu e passa de posts in custu blog mi so istraccadu de faeddare a sa sola.

S'omine est un animale soziale, si no faeddat cun sos paris suos e ite balet de che furriare su tempus a iscriere in s'internet?

Tando como mi so pensadu gai, o resesso a fagher unu blog pius abbertu e partezipadu o no isco si 'alet sa pena de sighire a iscrier goi, mi paret de iscrier pro a mie e tottu e no mi paret de comunicare cun nisciune.

Si b'at unu lettore unu in totu s'internet chi mi cheret dare unu cussizu e un accunortu benebennidu siat...sos istudentes puru mios chi faeddan unu pagu e cumprenden su sardu mi poden dare unu cussizu comente la sighire o che l'agabbare goi....

Saludos coriales e un 'abbrazzu a tottu...

PS custu post lu ponzo pure in Feisbuk, gai poto lompere a unu pubblicu pius mannu e si podet dare de poder tenner calchi cossizu...

UNU DICIU PRO MELEDARE: MEZUS CADDU TOPPU CHE CADDU MORTU.