Fotografia e memoria istorica.1

Thathari, su otto de Frealzu, duamizas e doighi.

SAS ARTES DE CUSTU SECULU: 1 FOTOGRAFIA, CULTURA E LIMBA

su campu de cuncentramentu nazista de Birkenau (Auschwitz)

Medas amigos s'ana a dimandare proite cust'importanzia chi damus a sa fotografia in custu blog de cultura e de limba sarda.
Una rejione b'at, ed est importante meda. S'oju est bistadu giamadu., de totu sos sensos, su pius tirannu ca ponet su selenziu a sos ateros cando issu est giamadu a servire s'intelligenzia ei sa cumprensione de su mundu.
No b'at ateru sensu chi unu siet pitzinnu o omine mannu, chei sa vista pro cumprender e descrier su mundu. Zertu, sas peraulas nos faghen cumprendere e arrejionare, ma sas peraulas poden esser puru imboligosas, impreadas pro trampare sa zente antzis de la fagher ischida.
Sa vista est difizile chi trampet sa mente.
Pro cuss'est chi sa fotografia no soletantu est unu mediu de comunicassione e de informazione ma est puru unu mediu de espressione artistica, un'arte.

A iscattare fotografias oe bi semus bonos tottu, a fagher una fotografia-opera d'arte sun pagos meda.

Hitler e Mussolini

Apo pensadu a sa fotografia comente un'arte de su noighentos e de sa modernidade ca nisciunu mediu - a parte forsis sa televisione - at unu potere goi mannu de fagher a bidere sa realidade de su mundu.
Pensamus a sas gherras, a sos fotografos de gherra de sa prima e de sa segunda gherra mundiale, a su Vietnam, a su giornalismu chena sa fotografia. Sa fotografia una orta ch'est leada faghet su giru de su mundu in pagas oras, e sa prima cosa chi idimus de una notiscia no est s'articulu, no est su titulu, est sa fotografia chi nos faeddat de sa materia de s'articulu primu de s'articulu matessi.
Sa fotografia est unu mediu de comunicassione potente meda, insuperadu, immidiatu, solu sa televisione chi est - in fundu - una elaborazione de fotografia e cinema - superat sa fotografia in potenzia.

Accò proite ponimus medas immagines in custu blog, ca tenen un iscopu didatticu chi sas peraulas no an a poder mai sostituire.

Zertu, finas sas fotografias poden esser manipuladas, ciambadas, falsificadas, ma una falsificazione de una fotografia declarat sa falsidade de chie l'ammustrat, giornale, rivista o partidu politicu.

In sa Russia stalinista fit cosa de ogni die a manuipulare sas fotografias de sos potenetes sigundu chi esseren in alta o bascia fortuna - propriu comente faghet su protagonista de 1984 de George Orwell.
Chie controllat su passadu - narat La fattoria degli animali - controllat su presente ei su tempus benidore.

E pro cuss'est chi su lettore devet sempre fagher ginnastica critica e no si fidare mai nè de sas paraulas e nè de sas fotografias matessi.

De onzi modu niune podet negare sa fortuna de sa fotografia in custu seculu, in sas notiscias, in s'informassione, in sa comunicassione, in s'istudiu, in s'arte (bastet de pensare a s'arte Pop americana e a sa manipulazione artistica de sas fotografias de Andy Wharol).

Cando deo penso a su seculu passadu, a su noighentos, deo bi penso pro su tramite de pagas fotografias, si las acciapo in s'internet bo' las ammustro subitu:

Auschwitz

su B 52 chi at isganzadu sa prima bomba atomica

sa bomba atomica
su pitzinnu ebreu cun sos bratsos pesados
sa morte de unu milizianu in Ispagna
sa pitzinnedda chi fuet nuda da una iddaredda in fiammas in Vietnam
Kennedy a Dallas
s'omine in sa luna
s'esercitu tedescu in Parigi
sa bandela americana in Iwo Jima
Pearl Harbour
Woodstock e sa rivoluzione hippy
Martin Luther King chi faeddat a sos dughentomiza de Washington

Woodstock, 1969

Nelson Mandela liberu
un'incrociu de Sarajevo
sa gherra Israelo-palestinese de su Jom Kippur
Stalin in sa Piatta Ruja
s'elicottero americanu bettadu in mare dae sa folla in Vietnam
Aldo Moro aintro su bagagliaiu de sa Renault 4 ruja
s'aereo de Ustica
sas istrages de Falcone e Borsellino
s'istrage de sa Banca de S'Agricoltura in Milano
s'istrage de Bologna
sos mortos dae sos brigatistas rujos....
sas massiddas de Mussolini in su balcone de Piazza Venezia
sas paradas de su fanatismu Hitlerianu
..........................................................

Immazine famada de sa gherra in Vietnam (1964-1974)

dognunu si podet fagher s'sitoria cun pagas fotografias de sa memoria, ma b'at fotografias chi no si poden e no si deven ismentigare, ca sunu monumentos de su progressu o de sa barbarie umana, a segunda.

Ei sa cultura sarda ite b'intrat?

RISPOSTA: Ello nois inue vivimus? in profundos de inferru? No semus de custu mundu?
Una cultura chi no chircat de cumprender e de isvelare sos ingannos de sa pulitica est destinada a fagher sa fine chi at fattu in sos regimes totalitarios. Morta e sepultada.