POESIA SARDA 'E SU NOIGHENTOS

Thathari, su doighi de Bennalzu duamizas e doighi

UNA POESIA DE PEDRU MURA

Como apo pensadu chi fit tempus de fagher lezere a sos battor amantiosos lettores de custu situ ismentigadu in sos mares de su webbe una pagina in limba sarda de sas pius bellas mai iscrittas in limba in su noighentos.

Est una poesia chi at unu sentire modernu, intimu, prufundu, in rimas liberas, in sardu nugoresu.

Sa limba est tosta comente sos nuogoresos matessi, aspra, istinchiddosa comente su tribagliu de s'operaiu chi primu de diventare poeta (Pedru Mura matessi) fit frailarju (fabbro).

Fippo operaiu e luche solìana

(dae sa regolta "Poesias d'una bida" )

E commo Deus de chelu
a chie canto
cust'urtima cantone cana?
A bentanas apertas
a su tempus nobu promissu
a Sardigna
barandilla de mares e de chelos?
Su bentu ghettat boches.
Commo m'ammento:
unu frore ruju
una melagranada aperta
una tempesta 'e luche
cussa lapia 'e ramene luchente!
Fippo operaiu e luche soliana
commo so' oscuru artisanu de versos
currende un'odissea 'e rimas nobas
chi mi torret su sonu 'e sas lapias
ramenosas campanas
brundas timballas e concas
e sartàghines grecanas.
Cada corfu 'e marteddu
allughia[t] unu sole
e su drinnire
de una musica 'e framas
m'ingrabidabat su coro
e mi prenabat sos ocros
d'unu mare 'e isteddos.
Frailarju 'e cantones friscas
camino a tempus de luche
pudande sos mezus frores
in custa paca die chi m'abarrat
prontu a intrare
in su nurache 'e s'umbra.
Gai fortzis su sole
in custa die de chelu
est benniu a cojubare
frores de neulache
chin fruttos de melalidone.

(Pedru Mura)