DONZI COSA A TEMPUS SOU
Custu manzanu fimis faeddende de web-blogs cun sos pitzinnos de iscola. E m'est bennidu a conca de lis ammustrare KISURAS comente esempiu de blog.
E gai est chi mi so abbistu chi fia duos annos chena iscrier pius mancu una paraula in su blog.
Sa cosa m'est dispiaghida. Mi so intesu che una mama chi s'ismentigat de unu fizu.
E m'est bennida sa gana de torrare a iscrier in su blog.
Zertu, como mi paret pius unu diariu personale che una rivista, ma su matessi est.
Custu solu pro m'essere abbistu chi sun passados duos annos dae s'ultimu post.
Su tempus cambiat e nos mudat. Nois mudamus paris cun su tempus. Deris fimis unos oe semus ateros. Donzi cosa cambiat e nois puru. Tottu est impermenente. Su corpus nostru mudat, sos pensamentos, sas bideas, sos sentimentos, sos sentidos.
Semus comente su tempus.
Sa vida nos mudat. Sos interesses chi nos parian mannos como nos paren minores, sos chi fini naschende nos paren mannos. A unos sun creschende a unos sun ismentigados.
Custu post, daboi e duos annos mi servit a bider si tenzo galu gana de mi kimentare cun custu blog.
No nde so seguru meda, ca sa cosa chi pius mi mancat est unu cuntattu frequente cun sos lettores ( battoro in tottu, an'a esser! si puru...).
Apo a pensamentu de ciambare piattaforma.
Si podet dare puru chi ciambende piattaforma si podat cuminzare a nou unu kaminu leadu como est otto annos jompidos a kapidanni.
Bah, istademi 'ene, tenidebos contu.
UNU DICIU PRO MELEDARE : donzunu si sinnat cu sa manu sua.
