BENTU DE CAMBIAMENTU?
Già paret chi, comente narat sogra mia, femina de sabidoria manna, "ne-i su male durat ne-i su 'ene". Cji poi est sa regula de su "divenire" de sas cosa umanas e de s'impermanentzia...
E gai est chi finas sas aeras de sa pulitiga italiana chi pariant frimmas e ammorteschidas che un corpus mortu, teteru e biaittu, parent in finis ispalattende...
Sas eletziones pulitgas dei su 24 e de su 25 de Frealzu passadu, puru si an lassadu su parlamento chena una maggiorantzia e cun pagas possibilidades de fagher unu guvernu comente si toccat, ana fattu intrare unu mannuju de zente comune in su parlamento grascias a su Muvimentu de Beppe Grillo M5S, ma no solu puru in su PD b'at medas caras noas e giovanes.No est beru chi nudda est cambiadu. Sa situatzione est difitzile meda, ca sos problemas de s'Italia sun frimmos dae nessi vinti annos, sos vinti annos de su partidu-padrone de Berluscone I, ma b'at un'aera de cambiamentu chi no si podet dennegare.
Sa crisi economica chi nos an cundidu sos americanos, sa crisi de s'euro e de s'idea europea, su guvernu europeu chi no est capatze de dissignare una pulitiga de creschenzia sustenibile e no de istrangugliamentu de sos tribagliadores e de sos pius poveros, sa disoccupatzione giovanile, sos licenziamentos, sa cassa integrazione, sa serrada de buttegas e negotzios, sa falada de su PIL, sun problemas mannos, ma non sun nudda in cunfrontu a sos problemas de sa pulitiga italiana e europea chi est imbetzada e chena rezettas ca ana perdidu calesisiat immaginassione.
Sa pulitiga economica europea est zurpa, zega e broina addainanti a sos problemas de s'economia de sas natziones de s'euro. An perdidu s'immaginassione, an perdidu sa creatividade, an perdidu su cuntatu cun sa realidade. Sun in sas manos de sa Merckel chi ischit solu istringhere sa buscia e diat cheret fagher de s'Europa una Grecia in fogu solu pro difendere su podere de sa Germania.No podet durare. No si podet sighire goi. No si podet lassare sa zente chena isperantzia, ca cando sa zente no at isperantzia niunu l'ischit ite podet fagher.
E duncas sa pulitiga, italiana, europea, deven dare una risposta noa, intelligente, solidale, una isperantzia de rinnovamentu e de mezorìa a sa zente a sos populos de s'italia e de s'Europa.
In s'impertantu sa zente si cuntentat de Franciscum, su paba bennidu "dae sa fine de su mundu", ma si gosat puru de sa Boldrini e de Pietro Grasso, sos presidentes noos de Camera e Semadu, finalmente duas caras istimabiles, onestas, integras, no currottas chei sos parlamentares de su PDL, servos de su padronu FRADE MANNU (Big Brother), de su Grande Fratello de Arcore.
Chi sas improvvisadas no sien finidas? Chi puru a su guvernu e a sa presidentzia de sa Repubblica si potan bidere caras noas, pulidas, onestas e no sos INCIUCIOS de sa pulitiga dalemiana e berlusconiana?
Deus lu cherfat, naraian sos betzos. E aggiunghian, buglia bugliende, ma no tantu, "ei sos carabineris"!
Ca, in tempos de cambiamentu, s'Italia ets una naztzione perigulosa meda, e fortzas reazionarias, iscuras e fascistas chircan sempre de che fagher torrare su tempus indaisegus, de semenare timorìa e divisione.
Istade abbistos.
